బంగారం, వెండి ధరలకు మరో ఎదురుదెబ్బ తగిలింది. అంతర్జాతీయ పరిణామాల ప్రభావంతో సోమవారం, సెప్టెంబర్ 14 సాయంత్రం దేశీయ బులియన్ మార్కెట్లో అమ్మకాల ఒత్తిడి కనిపించింది. అమెరికా ద్రవ్యోల్బణం, ఫెడరల్ రిజర్వ్ వడ్డీరేట్ల పెంపుపై అంచనాలు, ముడిచమురు ధరల పెరుగుదల విలువైన లోహాల ధరలను ఒత్తిడికి గురిచేశాయి.
గణేశ్ చతుర్థి సందర్భంగా తొలి సెషన్కు విరామం అనంతరం కమోడిటీ మార్కెట్ తిరిగి ప్రారంభమైంది. సాయంత్రం ట్రేడింగ్లో బంగారం, వెండి ఫ్యూచర్స్ నష్టాల్లోకి జారుకున్నాయి. సాయంత్రం 5:15 గంటల సమయంలో ఎంసీఎక్స్ గోల్డ్ అక్టోబర్ ఫ్యూచర్స్ 10 గ్రాములకు రూ.1,50,973 వద్ద ట్రేడయ్యాయి. ఇది 1.19 శాతం తగ్గుదల. అదే సమయంలో సిల్వర్ డిసెంబర్ ఫ్యూచర్స్ కిలోకు రూ.2,31,000 వద్ద కొనసాగాయి. వెండి ధర 1.70 శాతం క్షీణించింది.
అమెరికాలో ఆగస్టు వినియోగదారు ధరల సూచీ ఏడాది ప్రాతిపదికన 3.4 శాతం, నెలవారీగా 0.4 శాతం పెరిగింది. ఆహారం, ఇంధనాన్ని మినహాయించిన సూచీ కూడా నెలవారీగా 0.3 శాతం పెరుగుదల నమోదు చేసింది. ముఖ్యంగా ఇంధన ధరల పెరుగుదల ద్రవ్యోల్బణ ఒత్తిడిని పెంచింది.
ఈ నేపథ్యంలో సెప్టెంబర్ 16న జరిగే ఫెడరల్ రిజర్వ్ సమావేశంపై మార్కెట్ల దృష్టి పడింది. వడ్డీరేట్లు పెరిగే అవకాశాలపై అంచనాలు బలపడటంతో బంగారంపై ఒత్తిడి కొనసాగుతోంది. రేట్ల పెంపు డాలర్, అమెరికా ట్రెజరీ ఈల్డ్స్కు మద్దతుగా మారే అవకాశం ఉండగా, వడ్డీ ఆదాయం ఇవ్వని బంగారంపై పెట్టుబడిదారుల ఆసక్తిని ప్రభావితం చేయవచ్చు.
